a. Energieeffizienz

Erneierbar Energie. D’ëffentlech Hand soll Virbild bei der Notzung vun erneierbarer Energie sinn. Mir wëllen dofir d’Gemengeninfrastrukture kuerz- a mëttelfristeg op nohalteg Energie ëmrüsten.

Stroossebeliichtung energetesch verbesseren. Ee groussen Deel vum Stroumverbrauch vun der Mäerzeger Gemeng geet op d’Stroossebeliichtung zréck. Mir schafen ee neit Konzept fir no a no de Stroumverbrauch duerch energieeffizient a modern Liichtmëttel rofzesetzen.

Ëffentlech Ausschreiwungen opgrond vu Nohaltegskeetscritèren. Bei der Preparatioun vun ëffentlechen Ausschreiwunge leeë mir kloer Richtlinne fest déi d’Critèren Nohaltegkeet, Ëmweltbelaaschtung, Waasserverbrauch an Energieeffizienz berücksichtegen.

b. Natur an Ëmwelt

Landwirtschaft a Landschaftsfleeg gehéiren zesummen. Zesumme mat de lokale Bauerebetriber an dem spezialiséierte Naturschutzsyndicat SICONA (Syndicat intercommunal pour la conservation de la nature) setze mir eis fir eng aktiv Landschaftsfleeg an. Mir wëllen de Respekt virun der Natur an der Aartevillfalt, respektiv d’Erhalen an d’Schafe vu natierleche Liewensraim verbesseren.

Héich Waasserqualitéit garantéieren. An enker Zesummenaarbecht mam zoustännegen interkommunale Syndikat DEA (Distribution d’eau des Ardennes) an dem Waasserwirtschaftsamt, wëlle mir konsequent d’Drénkwaasserqualitéit verbessere fir och dee regelméisseg lästege Chlor-Geroch am Waasser z’eliminéieren. De geplangte Report-it kann och hei eng grouss Hëllef fir de Service technique sinn. Parallel dozou publizéiere mir regelméisseg déi obligatoresch Waasseranalysen. Mir huelen och déi néideg Investitioune vir fir de Schutz vun de Quellen a vum Grondwaasser ze garantéieren.

Entsuergung a Klärung vun den Ofwässer. D’Gemeng Mäerzeg ass zënter 2002 Member vum interkommunalen Ofwaasser-Syndikat SIDEN (Syndicat intercommunal de dépollution des eaux résiduaires du Nord). Enorm Investitioune sinn déi lescht zing Joer an d’Ofwaasserinfrastrukture gemaach ginn. Mir engagéieren eis, an enkem Kontakt mam SIDEN, fir ee konsequente Suivi ze maache fir den Ënnerhalt vun dësen Infrastrukturen, virun allem d’Reeniwwerlaafbecken.   

Reewaassernotzung optiméieren. Bei Sanéierungen a Neibauten vu kommunalen Infrastrukture, wëlle mir Reewaassernotzungssystemer aplange mat deenen z.B. Sanitäranlage waasserspuerend bedriwwe kënne ginn.

Offallentsuergung. An Zesummenaarbecht mam SIDEC (Syndicat intercommunal pour la gestion des déchets) striewe mir eng Optimiséierung vun der Offallentsuergung un. D’Bierger sollen an deem Kontext och méi sensibiliséiert an informéiert gi fir eng systematesch a korrekt Mülltrennung ze maachen.

Edukatioun. D’Gemeng soll och een zouverlässege Partner si wann et drëms geet emweltfrëndlech Sujeten an der Schoul oder an de Betreiungsstrukturen ze thematiséieren. Mir wëllen do z.B. Aktioune wéi d’Planze vun Hecken oder Beem logistesch a finanziell ënnerstëtzen.

a. Sécherheet

D’Mäerzeger Pompjeeën. De Mäerzeger Pompjeescorps ass méi wéi just ee Gemengeservice.  All eenzelne Pompjee verdingt de Respekt vun der Gemeng a sengen Awunner fir säi fräiwëllegen Engagement, zumools elo wou de First Responder System agefouert gouf wou d’Pompjeeën eng éischt medizinesch Betreiung garantéiere bis zum Antreffen vun enger Ambulanz, respektiv dem Samu. D’Gemeng soll een zouverlässege Partner sinn wann et drëms geet Sensibiliséierungscampagnen am preventive Brandschutz z’organiséieren, Equipement ze beschafen, finanziell Hëllefen ze garantéieren, asw. Och bei der zukünfteger Reform vun de Rettungsdéngschter bleift d’Gemeng ee gläichberechtegte Partner fir d’Entscheedunge matzedroe wat d’Sécherheet vun de Mäerzeger Leit betrëfft a fir de Pompjeescorps mat deem dofir noutwendegen Equipement auszerüsten.

Wanterdéngscht. Zesumme mam Service technique vun der Gemeng iwwerpréiwe mir wéi de Wanterdéngscht optimiséiert ka ginn. Mir zielen awer och op d’Verständnis vun de Bierger wann an extreme Fäll de Service net nokomme kann. D’Aféierung vum Report-it kann hei eng grouss Hëllef sinn.

Verstäerkt Zesummenaarbecht mat der Police. Wéi fir d’Verkéierssécherheet, striewe mir eng verstäerkt Zesummenaarbecht mat der Police un fir de Bierger ee méi grousst Sécherheetsgefill ze vermëttlen fir präventiv géint strofrechtlech Aktivitéiten (z.B. Abréch, Vandalismus, illegal Müllentsuergung, asw.) virzegoen.

b. Propretéit

Ee proppert Mäerzeg. An Ofsprooch mam technesche Service vun der Gemeng, mat Sensibiliséierungscampagnen a mam gudde Wëlle vun de Bierger, striewe mir ee permanent proppert Mäerzeg un op dat seng Awunner houfreg kënne sinn. Dëst beinhalt méi Gringflächen a Blummenarrangementer am Duerfkär a bei den Haaptgemengeninfrastrukturen. D’Aféierung vum Report-it erlaabt eis och hei dem Zil vum proppere Mäerzeg méi nozekommen.

c. Integratioun

Lëtzebuergesch als Integratiounssprooch stäerken. D’lëtzebuergesch Sprooch ass fir eis een zentraalt Element fir auslännesch Matbierger z’integréieren. Dofir wëlle mir déi kommunal a regional Offer u lëtzebuergesche Sproochecourse zesummen mat eise Partner konsequent ausbauen.

Welcome-Treffen. Nei Mäerzeger Awunner wëlle mir vun Ufank un iwwert d’Gemeng, hir Aktivitéiten an d’Veräiner informéieren. Mir organiséieren dofir regelméisseg Welcome-Treffen fir déi nei Leit an hirer neier Heemecht wëllkomm ze heeschen.

Parrainage. D’Bierger sollen d’Méiglechkeet kréien, ee Parrainage iwwert een oder méi „Nei-Mäerzeger“ z’iwwerhuelen fir esou z.B. bei administrativen Ofleef ze hëllefen oder fir hinnen d’Gemengeliewe méi no ze bréngen. Parrainage tëschent Lëtzebuerger a Net-Lëtzebuerger sollen et den auslännesche Matbierger erméiglechen d’Lëtzebuerger Sprooch méi einfach ze léieren (parrainage linguistique). D’Gemeng oder d’Integratiounskommissioun soll hei eng Vermëttlerroll iwwerhuelen.

„Veräinsdeeg“. D’Veräiner spillen déi wichtegst Roll fir d’Mäerzeger Duerfliewen. Mat Schnuppercouren a regelméissege „Veräinsdeeg“ kënnen nei Awunner besser integréiert ginn.

A Villfalt gëeent. Mir ginn der kommunaler Integratiounskommissioun déi néideg Mëttele fir Aktivitéiten z’organiséieren déi di verschidde Nationalitéiten am Duerf méi no an zesumme bréngen.

d. Inklusioun

Design for all: kommunal Infrastrukturen inklusiv renovéieren a plangen. Et ass fir eis eng Selbstverständlechkeet dass nei kommunal Infrastrukturen vun Ufank un esou geplangt solle gi fir dass se vu jidder Bierger ouni Barrière, d.h. behënnertegerecht, benotzt ka ginn. Bei de besteeënde Gemengeninfrastrukturen ass een enormen Nohuelbedarf néideg: mir wëllen dofir endlech Aarbechten um Gemengenhaus virhuelen fir dëst fir all Matbierger accessibel ze maachen. Déi selwecht Iwwerleeungen gëlle fir d’Schoulgebaier, d’Trottoiren an d’Buedembeläg op den Zebrasträifen.

Inklusioun fir jiddereen. Inklusiv soll eis Gemeng och sinn, wann et drëms geet, d’Kanner aus dem Internat Sainte-Marie an d’Awunner vun der Wunnstruktur déi vun der Op der Schock Asbl geréiert gëtt mat an d’Gemengenaktivitéiten anzebannen.

e. Sozial a gerecht

Eng Gemeng fir jiddereen. D’Gemeng Mäerzeg soll fir d’Leit aus all de soziale Schichten accessibel sinn. Déi kulturell Mixitéit dréit zur sozialer Kohäsioun vum Duerf bäi. Mir setzen eis dofir fir de Bau vu weidere soziale Wunningen an. Mir sti fir ee qualitative Wuesstum dee net op wëller Immobiliespekulatioun berout.

Office social Nordstad (OSNOS). Mir wëlle sozial schwaach Famille besser iwwert d’Hëllefsméiglechkeete beim OSNOS informéieren.

Demokratiséierung vu Sport a Kultur. De sozialen Hannergrond soll keng Barrière si fir Sport a Kultur am Duerf. Ënnert bestëmmte Konditioune kënne Jonker aus sozial schwaache Famillen een Deel vun der Veräinskotisatioun iwwerholl kréien.

f. Gesondheet

Liewensqualitéit. Mir wëllen de Mäerzeger Leit genuch Méiglechkeeten ubidde fir sportlech Aktivitéiten ze bedreiwen.

Besser informéieren. D’Gemeng Mäerzeg soll an d’Zukunft och am Beräich vum Gesondheetswiesen a vum Ëmweltschutz informéieren a sensibiliséieren, dëst an Zesummenaarbecht mat de Spezialisten aus de verschiddene Beräicher.

Haushalt ouni Pestiziden. Mir wëllen d’Bierger op d’Konsequenze vu Pestizide fir d’Natur a fir d’Gesondheet vum Mënsch opmierksam maachen an iwwer alternativ Weeër informéieren. Pestizidfräi Blumme sollen dem Kampf géint d’Ausstierwen vun de Beien bäidroen.

a. Liewen a wunnen

Nohalteg Entwécklung. Fir eis Gemeng nohalteg a kohärent ze plangen, wëlle mir an engem méi partizipativem Prozess d’Bierger an d’Projeten a Pläng abannen: Verkéiersregelung, Amenagement vun ëffentlechen Plazen, Trëppel- a Velosweeër, Vernetzung mat de Nopeschgemengen, Schutz an Erhalt vu prägenden Infrastrukturen, Astandsetzung vu Stroossen, asw.

Gring Plaze beim Amenagement vum ëffentleche Raum. Fir d’Liewens- a Wunnqualitéit zu Mäerzeg ze erhalen an ze verbesseren soll d’Natur net vernoléissegt ginn. Mir sinn net géint de sougenannte „Fauchage tardif“ wéi e schon eng Zäit zu Mäerzeg ëmgesat gëtt, sinn awer der Meenung dass dës Method op ëffentlechen visibele Plazen (z.B. d’Spillplazen) net déi adequat Léisung ass well se awer dacks d’Bild vun enger net propperer Gemeng erëmgëtt.

Verkéierssécherheet. Trotz dem Aféiere vun Tempo 30 a ville Stroossen vun der Gemeng, si vill Automobilisten nach ëmmer onverantwortlech ënnerwee. Mir sichen dofir no anere Moyenen fir dass d’Vitesse an dëse Stroosse ka respéktéiert ginn. Fir virun allem d’Schoulweeër méi sécher ze maachen iwwerpréife mir allgemeng d’Zebrasträifen am Duerf a maachen déi méi visibel fir d’Autosfuerer op oniwwersichtlechen Plaazen. An neie Wunngebidder wëlle mir och d’geziilt Ëmsetzung vu sougenannte verkéiersrouege „Spillstroossen“ iwwerpréifen. Op CR-Stroossen wou d’Gemeng net direkt d’Kompetenz huet z’intervenéieren, huele mir d’Initiativ fir mam zoustännege Ministère no Léisungen ze siche fir dës Stroosse méi sécher ze maachen. Fir géint onverantwortlecht Verhalen op der Strooss an och op ëffentleche Parkinger virzegoen, verstäerke mir de Kontakt mam zoustännege Policekommissariat fir regelméisseg präventiv Kontrollen duerchzeféieren.

Mobilitéit verbesseren. An Zesummenaarbecht mat der lokaler Bus-Entreprise a fir d’Mobilitéit vun de Mäerzeger Awunner ze verbesseren, féiere mir ee sougenannte Ruffbusmodell an. Dat soll virun allem Jugendlechen erlaben hire Fräizäitaktivitéiten ouni Aschränkung kënnen nozegoen, ouni op d’Elteren ugewisen ze sinn.

b. Schaffen

D’Betriber am Duerf. Mir ënnerstëtzen déi lokal Mäerzeger Entreprisen a maachen hinnen d’Liewen duerch Iwwerreglementatiounen net méi schwéier. Am korrekten Dialog siche mir zesummen no beschtméigleche Léisungen fir d’Problemer déi sech am Alldag kënne stellen. Bei de Gemengentaxen wëlle mir méi geziilt op déi spezifesch Bedürfnisser vun der Landwirtschaft an de Betriber agoen.

D’Mäerzeger Industriezon. Am enke Kontakt mat der Laach9166 Asbl déi sech fir d’Intressien vun de Betriber an der Industriezon asetzt, schafe mir ee Konzept aus wat et de schon etabléierten Entreprisen erlaabt sech auszebauen an nei Aktivitéiten unzezéien, ouni dobäi d’Liewensqualitéit vum Duerf ze beaflossen.

Sozial- a Solidarwirtschaft ënnerstëtzen. Mir ënnerstëtzen an encouragéiere privat Initiativen déi z.B. Gemeinschaftsgäert realiséieren oder an erneierbar Energien investéieren. Mir wëllen an deem Kontext Parrainagen fir ëffentlech Gringflächen erméiglechen, sou dass sech Bierger oder Entreprisen an Zukunft op Wonsch ëm d’Beplanzung vun ëffentlechen Gringflächen an hirer Strooss oder virun hirer Dier bekëmmeren däerfen.

c. Fräizäitoffer

Kulturschafend Mäerzeger aktiv fuerderen. Mir setzen eis dofir an, dass Kënschtler aus eiser Gemeng Raimlechkeeten an Infrastrukturen zougänglech gemaach kréien, fir dass si hierer kënschtlerëscher Aktivitéit kënnen nogoen. Mir wëllen de lokalen a regionale Kënschtler och d’Méiglechkeet ginn hir Wierker an der Gemeng auszestellen.

Veräiner ënnerstëtzen. D’Mäerzeger Gemeng soll d’Veräiner weider beschtméiglech finanziell ënnerstëtzen. Fir sozial méi schwaach Famillen entgéintzekommen, iwwerpréifen mir allerdings déi kommunal Subside fir se no sozialen Kritären ze adaptéieren.

Fräizäitsport fir Jonk an Aal. Mir wëlle de Fräizäitsport an eiser Gemeng fuerderen. Vill Sportler sinn net onbedingt a Sportsveräiner engagéiert. Dofir sollen zu Mäerzeg Fräifläche fir Sport a Spill ugeluecht ginn. Dozou gehéieren och d’Beschëlderung vu Spadséierweeër, Lafstrecken, Velos- a Mountainbikesweeër. An Zesummenaarbecht mam zoustännege Ministère a mat de Nopeschgemengen soll d’Gemeng Mäerzeg och un de nationale Réseau vun de Circuits auto-pédestres an de Velosweeër ugeschloss ginn.
 

Fräizäitaktivitéite fir Senioren. Mir ënnerstëtzen d’Mäerzeger Seniore beim Organiséieren a bei der Ëmsetzung vu kulturellen a sportlechen Fräizäitaktivitéiten op lokalem a regionalem Niveau.
 

Privatinitiativen fuerderen. Mir wëlle Privatinitiativen déi zu engem méi attraktive kulturellen Duerfliewe bäidroen finanziell a materiell duerch d’Zurverfügungstelle vu kommunalen Infrastrukturen fuerderen. Mir stellen eis do z.B. d’Organisatioun vun engem Museks- oder Konschtfestival vir. Avis aux amateurs!

a. Een optimalen Kader schafen

Den Dialog mam Schoulpersonal erëm hirstellen. Mir bedaueren et zudéifst dass zënter puer Joren ee ganz schlecht Arbechtsklima tëscht der Gemeng an dem Schoulpersonal besteet. Eng vun eisen Prioritéiten ass dëse Mëssstand ze behiewe fir der Mäerzeger Schoul an der Gemeng ee Neiufank ze erméiglechen. Duerch eng reell Kommunikatioun net nëmmen mam Schoulpersonal, mee och mam Schoulcomité an der Elterevertriedung soll erëm ee positivt Aarbechtsklima opgebaut ginn, dëst am Intérêt vun de Mäerzeger Kanner.

D’Mäerzeger Schoul kannergerecht gestalten. Mir setzen eis an fir kannergerecht schoulech Infrastrukturen déi mir zesumme mam Schoulpersonal an all de betraffenen Acteuren iwwerdenken fir ee méi motivéirend, gesond an altersgerecht Ëmfeld ze bidden. An dëser Optik wëlle mir bei Renovatiouns- oder Neibauprojeten d’Qualitéit an d’Funktionnalitéit vun den Infrastrukturen, banne wéi baussen, konsequent verbesseren.

Demografesch Entwécklung. Mir ginn nei Weeër wann et opgrond vun der demografescher Entwécklung vun der Gemeng Engpäss ginn wat d’Gréisst vun der Schoul a vun der Maison Relais betrëfft. An aussergewéinleche Situatiounen an no Concertatioun mat de betraffene Persoune, verschléisse mir eis net géint provisoresch Infrastrukturen déi no enger flexibeler a modularer Bauweis kuerzfristeg realiséiert kéinte ginn.

Viraussetzunge fir digitalen Enseignement schafen. Mir wëllen dat beschtméiglecht Léierëmfeld fir d’Schoulkanner ubidden. Dozou gehéieren eng modern Ausstattung a genuch Informatikmaterial fir d’Schüler op d’Erausfuerderunge vun der haiteger Zäit virzebereeden. Déi noutwendeg Infrastrukturaarbechten an Akeef ginn an engster Zesummenaarbecht mam Schoulpersonal realiséiert, ënnert der Berücksichtegung vun de budgetäre Mëttelen.

Mam Bus an d’Schoul. Zesumme mat den Elteren a Kanner analyséiere mir ob et Sënn mécht fir zu Mäerzeg ee Schoultransport z’organiséiere mam Objektiv fir zu de Spëtzestonnen am Duerfkär manner Verkéier ze hunn an also méi Sécherheet kënnen ze garantéieren.

Zesummenaarbecht tëscht Mäerzeger Schoul, Maison Relais, Crèche, Internat a Veräiner fuerderen. Wann d’Betreiung vun engem Kand a méi Hänn läit, ass eng kohärent Zesummenaarbecht tëscht all den Acteure vu grousser Wichtegkeet. D’Aarbecht mat de Kanner virun allem an der Schoul a Maison Relais soll permanent openeen ofgestëmmt sinn. Mir wëllen och d’Zesummenaarbecht tëscht der Schoul an der Maison Relais mam Internat, de Sportsveräiner an der Mäerzeger Musek verbesseren. D’Gemeng kann a soll hei d’Roll vum Vermëttler iwwerhuelen.

Mini-Mäerzeg. Mir wëlle gemeinsam Initiative vum Léierpersonal an de Kanner ënnerstëtzen, z.B. bei der Gestaltung an Ëmgestaltung vu Schoul- a Fräitzäitinfrastrukuren. Zil dovun ass ee Mini-Mäerzeg ze schafen wou d’Kanner op eng spilleresch Art a Weis léieren, Verantwortung z’iwwerhuelen an d’Erausfuerderunge vum Alldag am Beruff an am Gemengeliewen kennenzeléieren.

Méi flexibel Ëffnungszäiten vun der Maison Relais an der kommunaler Crèche. Bei Bedarf setzen mir eis an, an Ofsprooch mam zoustännege Personal, fir méi laang Ëffnungszäiten an der Maison Relais a kommunaler Crèche anzeféieren fir der Demande vun Elteren déi z.B. op Schichte schaffen, nozekommen.

Gesond a regionaalt Iessen an de Betreiungsstrukturen. Mir garantéieren dass weiderhin am Schoulrestaurant vun der Mäerzeger Maison Relais kanner- an altersgerecht Ernährung aus virun allem regionale Produiten zerwéiert gëtt. Am normale Schoulbetrib leeë mir dernierft och vill Wäert op regelméisseg Aktioune wéi „Schoulmëllech“ a „Schouluebst“ déi eng wichteg ernährungserzéieresch Roll fir d’Kanner erfëllen.
 

Oppe Betreiungsstrukturen. An Ofsprooch mam zoustännege Personal wëlle mir d’Betreiungsstrukturen esou organiséieren, dass si och vun Elteren déi hir Kanner doheem versuergen als Kontakt- an Ulafstell an Usproch däerfe geholl ginn. Mir wëllen an deem Zesummenhang eng Vermëttlerroll iwwerhuele fir agreéiert Dagesmammen a Babysitter ze proposéieren.
 

„Jonk begéint Al“. Mir bedaueren dass zu Mäerzeg keen traditionellt Altersheem méi ass. Fir d’Lach tëscht zwou oder esouguer méi Generatiounen ze schléissen, wëlle mir awer d’Betreiungsstrukturen an d’Internat encouragéiere fir gemeinsam Aktivitéite mat den eelere Matbierger z’organiséieren. Och do kann a soll d’Gemeng eng Vermëttlerroll iwwerhuelen.

b. D’Mäerzeger Jugend

„Jugendgemengerot“. Mir wëllen dass d’Jugend sou wäit wéi méiglech an Decisiounsprozesser, déi si direkt uginn, mat agebonn ginn. Eng Delegatioun vun der Jugend, ee sougenannte „Jugendgemengerot“ soll dofir regelméisseg dem Schäffen- a Gemengerot iwwert eventuell Problemer a Wënsch vun der Mäerzeger Jugend rapportéieren. D’Iddien an d’Virschléi ginn an engem Jugendkommunalplang festgehal fir kuerz- a mëttelfristeg ëmgesat ze ginn.

Jugendaarbecht vun de Veräiner fuerderen. Eis Sport- a Kulturveräiner spillen eng immens wichteg Roll am Beräich vu Kanner- a Jugendbetreiung. Mir wëllen dës Leeschtungen duerch e gerechten Subsid unerkennen. D’Käschten déi d’Veräiner am Beräich vun der Aus- a Weiderbildung vum Betreiungspersonal hun sollen och finanziell vun der Gemeng honoréiert ginn.

Finanziell Ënnerstëtzung vun der Late Night Bus Norden Asbl. Mir ënnerstëtze weider d’Late Night Bus Norden Asbl déi virbildlech de sécheren Transport vun de Jugendlechen op verschidden Evenementer duerch de ganzen Norden koordinéiert.

Kultur an Infrastrukturen. D’kulturell Offer däerf de jonke Public net vergiessen. Mäerzeg huet eng Jugendzeen déi mir ënnerstëtze wëllen. Existent Infrastrukture musse méi accessibel gemaach gi fir déi Jonk (z.B. Terrain am Park beim ale Schoulgebai), och ausserhalb vun de Schoulstonnen. Iwwert de Jugendkommunalplang setze mir eis gemeinsam Ziler fir d’Gemeng nach méi attraktiv ze maachen.

Aktiv an engagéiert fir eis Jugend. An Zesummenaarbecht mat der Nordstadjugend Asbl déi d’Mäerzeger Gemeng finanziell ënnerstëtzt, wëlle mir de Jugendlechen am Duerf Projeten, Aktivitéiten a Workshope zu deenen ënnerschiddlechsten Themen ubidden (Kultur, Sport, Aarbechtswelt, Präventioun, Informatioun, asw.).

a. Informatioun a Kommunikatioun

Traditionell a modern Kommunikatiounsmëttel. D’Bierger sollen een einfache Kontakt zu hirer Gemeng hunn. Nierft dem Telefon wëlle mir virun allem déi modern Kommunikatiounsmëttel wéi Internet, E-Mail, SMS (e.a. de Service sms2citizen) an déi sozial Medie mat abannen. Mir féieren eng systematesch Informatiounspolitik fir d’Bierger an. Mir kombinéieren do déi traditionell a modern Kommunikatiounsmëttel, woubäi ee neien Internetsite d’Aushängeschëld vun der Gemeng soll sinn a regelméisseg iwwert Neiegkeeten a Wëssenswäertes aus a vun der Gemeng informéiert. Mir loossen an deem Kontext och eng App fir Smartphones entwéckelen déi, mam Site, d’Bierger non-stop um courant hällt.

Elektronesch Informatiounstafelen. Bei der Gemeng riichte mir eng elektronesch Informatiounstafel an wou all Bierger sech bequem informéiere kann. Fir wichteg Informatiounen oder Evenementer vun de Veräiner unzekënnegen, stelle mir och esou Informatiounstafelen an den Haaptagäng vu Mäerzeg op.

Report-it. Mir schafen um neien Internetsite an der App eng Rubrik Report-it wou d’Bierger ganz einfach via Handy dem techneschen Service vun der Gemeng Mängel oder Defekter bei ëffentlechen Infrastrukturen kënne matdeelen.

Chantier-Management. Zu enger biergernoër Informatiounspolitik gehéiert och fir systematesch iwwert aktuell a bevirsteeënd Chantieren ze kommunizéieren.

b. Déngscht um Bierger

Biergerbüro mat flexibelen Ëffnungszäiten. D’Gemengeverwaltung soll wéi een Déngschtleeschtungsbetrib funktionnéieren an dofir als modernen Biergerbüro opgestallt gi mat méi flexibelen Ëffnungszäiten wou de Bierger gängeg Verwaltungsvirgäng séier an onkomplizéiert gemaach kritt. Mir wëllen dofir, an Ofsprooch mam Gemengepersonal, nieft der wöchentlecher „Ouverture nocturne“ och eng „Ouverture matinale“ ubidde fir dem Bierger nach méi entgéintzekommen bei den administrativen Demarchen.

Biergerstonnen. Mir organiséiere regelméisseg Biergerstonne wou d’Awunner dem Buergermeeschter, respektiv dem Schäfferot, hir Suergen, Problemer a Virschléi kënnen matdeelen.

Gutt forméiert Gemengepersonal. D’Gemengepersonal spillt eng wichteg Roll am Kontakt mat de Bierger, souwuel wat d’Administratioun wéi den technesche Service betrëfft. D’Gemeng soll ee fortschrëttlechen Employeur sinn an duerch nei, motivéierend Konzepter sécherstellen, dass d’Personal déi gestellt Aufgabe mat Engagement a Motivatioun ugeet an déi zur gréissten Zefriddenheet vun de Bierger erfëlle kann.

e-Mäerzeg a „Simplification administrative“. Eist Zil ass, dass d’Bierger all administrativ Ufroen an Déngschter online ausféiere kënnen, souwäit daat technesch a juristesch (elektronesch Ënnerschrëft) méiglech ass.
 

Online perséinlech Dokumentenasiicht. Ähnlech wéi op nationalem Plang de myguichet.lu funktionnéiert, wëlle mir och kommunal administrativ Demarche méi transparent fir de Bierger gestalten. Sou kritt jiddereen elektronesch Asiicht a seng Akten an den aktuelle Stand vu senger Demande.
 

Kommunal Mediatiounsstell. Streidereien ënnert Noperen gehéiere leider och zu Mäerzeg zum Alldag. De Buergermeeschter ass an deene meeschte Fäll net zoustänneg fir do ze schlichten, ausser de kommunalen „Ordre public“ wier betraff. Fir enger Zivilklo virum Friddensriichter aus dem Wee ze goen, maache mir d’Bierger opmierksam op d’Servicer vum Centre de médiation civile et commerciale (CMCC) deen an esou Fäll déi richteg Ulaafstell ass.

c. Transparenz

Gemengerotssitzungen. All Gemengerotssitzungen ginn systematesch annoncéiert mam betreffenden Ordre du jour. Déi komplett Rapporten vun de Sitzungen sinn an engem kuerzen Delai ëffentlech.

Online Zougang zu Dokumenter. All administrativ Dokumenter (déi net dem Dateschutz ënnerleien) stelle mir onbegrenzt um Internetsite vun der Gemeng zur Verfügung.