ZESUMME FIR MÄERZEG
Léif Mäerzeger,
Léif Wielerinnen a Wieler,
De Sonndeg, 11. Juni 2023, wielt Dir ee neie Gemengerot deen eis schéi Gemeng Mäerzeg déi nächst sechs Joer weider moderniséiert an entwéckelt fir de sëllegen Erausfuerderungen vun eiser Zäit gerecht ze ginn. Mir sinn eng Equipe vu néng Fraen a Männer – wéi d’Unzuel vun de Stëmmen déi Dir maximal kënnt verginn – déi sech wéi 2017 forméiert huet mat engem gemeinsamen Zil: Äert Vertraue gewanne fir esou an der Kontinuitéit fir eis Gemeng weiderzeschaffen.
Mir sinn d’Equipe ronderëm de Buergermeeschter, éischte Schäffen an zwee aktuell Gemengerotsmember déi sech bëssen erneiert huet. Mir respektéieren de Choix vun de Mandatairen déi aus familiäre, berufflechen oder perséinleche Grënn net méi kënne kandidéieren.
Mir stinn an der Verantwortung a wëllen eis Gemeng, opbauend op dat wat scho gemaach ginn ass, weidergestalten a sinn houfreg op de Bilan deen aus der Mandatsperiode 2017 bis elo presentéiert ka ginn. Do ass et d’Ëmsetzung vu praktesch der ganzer Schäfferotserklärung wou mir eis elo an Zukunft virun allem op déi deelweis Erneierung a Moderniséierung vun de Bildungsinfrastrukturen – Schoul & Maison Relais – konzentréieren a wou de Chantier grad ugefaang huet.
No vill Engagement an Aarbecht tëscht der Gemeng an de Schoulpartner freet jiddereen sech op dat wat kënnt, an de grousse Chantier vun der dringend gebrauchter neier Schoul wäert d’Gemeng intensiv bis d’Rentrée 2026 beschäftegen.
Donieft ginn d’Stroossenaarbechten konsequent weidergefouert: wéinst der Drénkwaasserleitung fir d’éischt déi ganz Méchelbucher Strooss vun der Haaptstrooss bis op de Butzebierg wou d’Ausschreiwung elo erfollegräich ofgeschloss ginn ass an de Chantier nach virum Summer ufänkt.
D’Industriezon wéi all d’Stroossen déi net méi am beschten Zoustand sinn kommen dono drun an d’Projeten leie praktesch prett am Tirang. Dat ëmmer mam Virsaz fir d’Sécherheet ze verbesseren an d’Reseauen komplett ze moderniséieren an op de leschte Stand vun der Entwécklung am Beräich Drénkwaasser, Kanal an Ofwaasser, Stroum an Telekommunikatioun, wéi Beliichtung ze bréngen.
Nieft dësen Infrastrukturaarbechten setze mir eis weider fir d’Zesummeliewen an der Gesellschaft an, andeems mir d’Veräiner finanziell wéi logistesch optimal ënnerstëtzen, déi „Al Schoul“ bei der Kierch als Bierger- a Veräinshaus fir jonk a manner jonk – en „Haus fir jiddereen“ – ëmgestalten. D’Aarbechten gi gutt virun an d’Raimlechkeeten kënnen Enn vun dësem Joer a Betrib geholl ginn.
Administrativ wéi kommunikatiounstechnesch huet Mäerzeg sech an de leschte Joren komplett nei opgestallt. Mam neien an dynamesche Gemengepersonal dreiwe mir dëse Prozess virun a wëllen an Zukunft déi verschidden Instrumenter a Kanäl nach besser notzen an optimiséieren.
Mir setzen eis weider dofir an, dass Dir Mäerzeger houfreg op Är Gemeng kënnt sinn: eng lieweg Gemeng mat enger kompletter Offer vun Infrastrukturen, mat dynameschen, kultur- a sportbegeeschterte Veräiner fir Jonk an Al, enger intakter Natur mat flotte Spadséier- a Vëlosweeër an enger adequater Offer vun Déngschtleeschtungen a Fräizäitaktivitéiten.
Mat der obligatorescher Refonte vum generelle Bebauungsplan (PAG) hu mir eis dofir agesat, fir e vill méi moderaten a méi luesen Wuesstem ze garantéieren. Fir d’éischt gëllt et an de nächste Joren d’Infrastrukturen ze moderniséieren a mir engagéieren eis, dass eis Gemeng e schéint a liewenswäert Duerf am ländleche Raum bleift mam Fokus op d’Allgemengwuel, ganz am Sënn vun eisem Leitmotiv #mertzig4all – eng Gemeng fir jiddereen.
Op de nächste Säiten kënnt Dir Iech een Iwwerbléck verschafen vun eisem ëmfangräiche Bilan a Programm an der Kontinuitéit. Eis Equipe ass sech der Verantwortung an de villen Erausfuerderunge bewosst an ass bereet fir se weider unzepaken. Mir zielen dofir op Är Ënnerstëtzung a soen Iech Merci fir eis weiderhin Äert Vertrauen ze schenken.
Marcel BARROS - Stefano D’AGOSTINO - Claude FISCHER - Lena GOMES - Myriam HANSEN - Fernie LALLEMAND - Carine PIETTE - Mike POIRÉ - Lex SCHWIND